Ode a sa tristesa (Pablo Neruda)

Ode a sa tristesa

           (Pablo Neruda)


 Tradutzione: Frantziscu Sotgiu Melis Pes

Tristesa, carrabusu

de sette francas segadas,

ou de nappu 'e soloriga,

serrone malecontzu

ossamentas de cane femina:

Innoghe no intras.

No passas.

Baediche.

Torra

a cabu ‘e josso cun su paraccu tu

torra

a cabu ‘e susu cun sos tuos dentes de coloru.

Innoghe bivet unu poeta.

Sa tristesa no podet

intrare dae custas zennas.

Dae sas ventanas

intrat s'aria de su mundu,

sas rosas rujas noas,

sas pandelas ricamadas

de su pòpulu e sas bitorias suas.

No podes.

Inoghe no intras.

Assucula

sas alas tuas de tzuntzurreddu,

jeo apo a pistare sas pinnias

chi ruen’ dae su entinu tu,

jeo  apo a ispraghere sos cantos

de sos ossos tuos

a sos batoro puntos de su entu,

Ti tiro su tzugu,

ti coso sos ogos,

ti che sego su sudàriu

e ch' interro sos ossos tuos de rosigadore

suta s' 'eranu de una mata 'e mela.