Questo racconto ha vinto il terzo premio alla IX edizione del Premio Letterario Città di Olbia 2022, nella sezione Racconti Brevi in Gallurese e Logudorese. Questa la motivazione della giuria:
“Il valore di Abilas di Franco Sotgiu, risiede nel costrutto rigoroso e quasi scientifico del racconto. Alla lettura vi traspare una conoscenza sicura, un rapporto virtuoso con l’ambiente, un affetto reverenziale nei confronti della natura rappresentata qui dalle due aquile ma anche dai paesaggi e dal tempo. Descritto con una lingua piana e plastica, Abilas è un canto d’amore, una implicita esortazione al rispetto verso un modo sempre più vilipeso e ignorato da un uomo distratto e spesso egocentrico e superficiale.”
Eccolo in sardo (versione originale) e a seguire la traduzione in italiano
Àbilas
Duas
àbilas, mascru e femina, ant fatu su nidu in una roca càrchina chi s'acaraiat
subra unu frùmene in mesu ‘e sos montes.
A s'ater'ala de sas abbas de su frùmene, unu terrinu amuntadu de matas de
èlighe chi sighiant sa pala dae su cugutzu fintzas a arribare a pustis
sete-otighentos metros a cunzaduras, aradas o paschias de arbeghes e bacas.
Terrinos saliosos, inue cun su bestiàmene collidu de pastores e bacàrzos
bivent fintzas sas bestias arestes: sirbones e chervos, murvas e matzones,
cunillos e lepores, assiles e annaemeles, e in custos ùrtimos annos in mesu a sos
tramatzos, a sos zuncos e a sas cannas, est arribadu cuss'ispetzia de sòrighe
zigante chi mutint nutria.
Canta abundàntzia po àbilas e astores, chi depiant solu chirrare
s'ismurzu!
Eppuru, intames totu cussas predas, in s'ìsula nostra su nùmeru de sas
àbilas, annu pustis annu, sighit a ismenguare e oramai paga zente podet nàrrere
de aer bidu su bolu de s'àbila.
Duos òmines peròe cussa fortuna la teniant: deo e Pedru. Deo naturalista
po passione e Pedru, unu ornitòlogu e istudiosu de sos rapatzes. Cun sos annos,
amos tentu sa sorte de bìdere in ziru peri sa Sardigna, dae sos iscóglios de
Carloforte a sas rocas de pedra mòlina de Bosa e Montresta, a sos granitos de
su Gennargentu e de su Limbara, a sos cugutzos de roca càrchina de Baronia e
Sarcidanu: astoritos e gunturzos, àbilas e astores, a bortas cuidende sos nidos
dae sos furones a duas ancas chi che cheriant furare oos e bentreddos; àteras
po los istudiare o solu po los bìdere e contare. Sa borta chi bos so contende,
sas àbilas las amos bidas po cumbinatzione.
Fumis in ziru chircande de cumprèndere a inue andaiant una deghina de
gunturzos chi moviant su bolu dae sos nidos de Badde Orca subra Bosa e impunnaiant
cara a bentu 'e sole. In cussos ziros, pregontende a sa zente chi biviat sartos
e padentes, che semus capitados in d'unu cuile inue unu pastore nos at nadu chi
no, issu gunturzos non nde at bidu, ma at bidu àbilas, duas, e ischiat fintzas
inue teniant su nidu.
Gai semus arribados a cussu logu, e in mesu ‘e sas matas de èlighe e aladerru
e a sas molas de murta e de chessa, subra su trèmene chi finiat in su frùmene,
amos fraigadu una pinneta cuada in mesu ‘e sa sirba, cun frunzas pigadas dae
sos muntones de naes segadas dae sos operajos chi tribagliaiant in su cantieri
de sa forestale. Dae sas ventaneddas de cussa pinneta cun binòculos,
cannochiales e lentes de sa machina fotogràfica podiamos bìere propriu cara a
nois, su nidu de sas àbilas.
Fiat su mese de martzu, e nois ischiamos chi in cussu mese podiant
comintzare a si fàghere su nidu.
Ma in cussas dies, in su chelu de mesu montes subra su frùmene amos
assistidu a sos giogos de cussas duas àbilas chi pariant ballende. In s'aria si
sighiant in bolu e a bortas si poniant fùsidas una contra a s'àtera chi pariant
chi si cheriant atumbare, a bortas si iscàmbiant predas chi aiant catzadu
chissai da inue: unu cunillu daiat unu e s'àtera li torraiat unu tidone, si los
betaiant dae s'artu a giosso fintzas a distàntzias de chimbanta o chentu
metros. Fiant sos rituales de corteju.
Infatis a pustis de pagas dies amos bidu chi in una ispacadura in mesu ‘e
sa roca ant comintzadu a pònnere naigheddas sicas de linna e subra sas naes
fozas friscas. Fiant fraighende su nidu, ma no lis bastaiat unu: a pagos metros
dae su primu amos bidu chi si ant fatu un'àteru nidu sìmile. Duas dies a pustis,
abaidende cun su cannochiale amos bidu chi in su primu nidu b'aiat un'ou chi a cabu
de tres dies sunt diventados duos. Su mascru est isparidu e sa femina at
comintzadu a crochire sos oos; ischiamos chi passaiat unu mese e mesu prima chi
tiant nàschere sos bentreddos, e amos detzisu nois puru de torrare a sighire
sas duas a pustis unu mese e mesu.
Semus torrados a sa pinnetedda nostra paris cun s’àbila mascru, àpenas
abertu su primu ou, a ùrtimos de su mese de arbile.
Dae sas ventaneddas de sa pinneta cuada in sa sirba, usende cannochiale o
binòculu amos sighidu sa crèschida de sos bentreddos e amos cumpresu chi ambas
àbilas cando bi fiat su bisonzu andaiant a catza: a bortas torraiant a su nidu
cun una nutriedda minore, àteras cun una pùliga catzada in frùmene, una cun unu
sirboneddu batidu dae su mascru. Pagas bortas est capitadu de las bìere
torrende a farrancas bòidas. Prus de una borta nos est capitadu, invetzes, de bìere
sighinde-las in su bolu de torrada, crobos o corrogas chi las istrobaiant.
Tando m’amentaia de sa paristòria chi ziraiat in internet de unu crobu
chi poniat sas farrancas suas in palas de s'àbila e chi la bicaiat in tzugu. E
de s'àbila chi ispraghiat sas alas bolende semper prus in artu fintzas a cando
su crobu ruiat a terra mortu ca li mancaiat s'ossizenu. Mi faghiat riere, ma mi
agradaiat a pentzare chi s'àbila si aiat comporadu in Amazon, unu respiradore e
una bomboledda de ossizenu.
Sa veridade est chi crobos e corrogas istrobant sos
puzones francudos, chi siant àbilas o astores, tzurulìas o àteru, po los batire
a su puntu chi arrennegados aperint sas farrancas e faghent rùere a terra sa
preda chi fiant carrende a su nidu.
A bortas bi resessint.
Unu manzanu a su comintzu de su mese de lampadas,
semus torrados a sa pinneta. Su mascru s'est pesadu in bolu de bonora pro
andare a catza ispraghinde sos duos metros de alas. Sa femina est abarrada in
bolu acanta a su nidu abbaidende semper cara a sos àbilastros. Cun su
cannochiale puntadu a su nidu, nois puru amos bidu chi sos duos puzoneddos fiant
comintzende a pònnere pinnìas e ischiamos chi no mancaiat meda a su tempus chi
faghiant sos primos bolos.
In su mentres chi fumis abbaidende su nidu,
intendimus bènnere dae atesu su tzichìrriu de su mascru. Amos bidu chi sa
femina ispraghiat sas alas cara a cussu tzichìrriu. Amos puntadu sos binòculos
cara a inie e ...
S'àbila mascru bolaiat subra su frùmene a
duos-treghentos metros de artesa, in farrancas giughiat carchi animale catzadu
pagu prima. A inghìriu duas corrogas l'istrobaiant chircande de lu biculare.
Chircaiat de bolare prus in artu ma lu sighiant, s'abbassaiat ma lu sighiant
etotu, bolaiat cara a sa femina chi però abarraiat in bassu prus de chimbanta
metros. Cando sa femina est arribada suta de issu, at abertu sas farrancas
lassande-che falare a terra s'animale chi aiat catzadu. Sa femina at abertu sas
farrancas e at aferradu sa preda sena frimare su bolu. Propriu comente faghiant
giogande cando fuint in corteju. A pustis si est zirada e est bolada cara a su
nidu. Su mascru no l'at sighida, at puntadu cara a susu bolende in artu e a
pustis de pagos segundos amos bisu un'ispètzia de fritza zigante falare fùsida
che bentu cara a sas corrogas e luego, su tempus de una serrada de pibiristas,
un'iscòpiu de pinnias chi ant prenu s'àera inue prima b'aiat una corroga.
Fùsida, s'àtera abarrada intrea, est bolada cara a
bassu chirchende de si cuare in mesu a sos chimos de tramatzu. Ma a pustis,
un'àtera fritza, un'àteru iscòpiu, un'àteru bentulare de pinnìas. Sas duas
corrogas no ant a istrobare prus a nemos.
Tando, acabadu su tribagliu, su mascru puru est
boladu a su nidu e cun sa femina e sos àbilastros s'ant partidu su lepore.
Cussa fit s'ùrtima visita nostra a sa pinneta e a
sas àbilas subra su frùmene in mesu montes.
*****
